№ 10 сабақ. Қарым-қатынас мәдениеті.

«Өзін-өзі тану» сабағының жоспары

Мектеп «Жеңіс» негізгі мектебі

Мерзім 16.11-21.11.2015

Мұғалім: Суханова Алтынай Абдраманқызы

Сынып: 7 «А»

Оқушылар саны 21

Тақырып: № 10 сабақ. Қарым-қатынас мәдениеті .

Құндылық: Сүйіспеншілік

Қасиеттер: шынайылық, адамдарға риясыз қызмет ету, жанашырлық

Мақсаты: Оқушыларға қарым-қатынас мәдениетін сүйіспеншілік құндылығы арқылы мәнін ашу.

Міндеттері:

Білімділік: Оқушыларға жағымды,ізгілікті қарым-қатынас жасаудың мәнін, маңызын түсіндіру;

Дамытушылық:Жағымды қарым-қатынас жасай алу дағдыларын дамыту;

Тәрбиелік: Жағымды қарым-қатынас жасай алуға, ізгілікке тәрбиелеу.

Ресурстар:

Оқулық, дәптер, үнтаспа, түрлі - түсті қағаздан жасалынған жүрекшелер. бояуыштар, плакат

Сабақ барысы:

Ұйымдастыру кезеңі. Оқушылармен амандасып, «Өзін- өзі тану» сабағының ережесін «5-Т» дауыстап айтамыз

Тәртіп

Талап

Тыныштық

Тазалық

Татулық

Тыныштық сәті.

Су асты патшалығына ойша саяхат.

(Оқушылардан қолдарын тізесіне немесе үстел үстіне қоюды, аяқтарын айқастырмауды өтінеміз. Арқаларын тік ұстауын қадағалаймыз. Жайлы, баяу музыка қойылады).
Көзіңізді жұмыңыз және бірнеше рет терең тыныстаңыз; денеңізді босатыңыз. Бірнеше секундтан соң теңіз түбіне саяхат жасаймыз.

Теңіз жағасымен келе жатқаныңызды елестетіңіз. Толқындардың жеңіл шалпылына, шағалалардың шуылына құлақ түріңіз. Жалаң аяқтарыңызбен құмды сезініңіз. Шалғайдан қара нүкте көріп тұрсыз: ол жақындаған кезде дельфин екенін түсіндіңіз. Ол сізді теңіз түбіне алып кету үшін келді. Ол өте әдепті жәндік, сізді шыдамдылықпен күтіп тұр. Жайлап оның арқасына отырыңыз, мықтап ұстап, жолға шығыңыз. Дельфиннің арқасында жайланып отырып, өзіңді қауіпсіз сезіну, су астында жүзу қандай керемет. Жан-жағыңызға қараңыз: мұнда кемпірқосақ тәрізді арлы-берлі жарқырай қалқыған әсем балықтар қаншама. Теңіз түбіне бойлаған сайын айнала қалайша өзгереді, суда тербелген қаншама ғажайып балдырлар. Қараңызшы, қандай орасан зор балықтар, ал енді анау жаққа көз тастаңыз... бұл орасан зор сегізаяқ. Су асты неткен қызықты әрі ғажап әлем. Сіз бір нәрсені байқадыңыз ба? Мұнда неткен тұңғиық, толық тыныштық. Осы тыныштық күйде болыңыз.(Мұғалім бірнеше секунд үнсіз қалады).

Ал қазір жоғарыға, өз әлемімізге кері қайтуға дайындалыңыз. Айналаға жіті қараңыз. Ғажап түстерге тағы бір рет қараңыз және тыныштыққа құлақ түріңіз. Осындай тыныштық сізге самалдай әсер береді. Енді дельфин кері қарай жолға шықты. Сіз су бетіне шықтыңыз, жағаға жақындадыңыз. Дельфиннің арқасынан түсіңіз, оны сипалаңыз және осындай ғажап саяхатқа апарғаны үшін ризашылық білдіріңіз.

Сыныпқа оралыңыз және өз орныңызға келіңіз. Бірнеше секундтан соң көзіңізді ашыңыз, осы түйсінген тыныштықты өз бойыңызда сақтауға тырысыңыз.

Үй тапсырмасын тексеру.

57-60 бетттегі Данэль Дефоның «Робинзон Крузо» романының үзіндісін оқып келу.

• Шығарманы оқығанда қандай сезімде болдыңдар?

• Кейіпкердің сағынышының сыры неде?

• Ол неліктен адамдар қауымына талпынды деп

ойлайсыңдар?

• Оған қалай көмектесер едіңдер?

• Адам өмірін жалғыз өткізе ала ма?

Ескерту

Дәйексөз.

«Адам өміріндегі ең тамаша нәрсе - оның басқа адамдармен қарым-қатынасы.»

А.Линкольн

- Қарым-қатынасты қалай түсінесіз?

- Үлкен мен кіші арасындағы қарым-қатынас несімен

ерекшеленеді сіздердің ойыңыз?

- Қарым-қатынаста табысқа жетудің сыртқы

жағдайлардан гөрі адамның ішкі жан дүниесіне, ниетіне

байланысты екеніне келісесің бе?

• Сәтті қарым-қатынас орнату үшін қандай қасиеттер керек?
  
  

(Дәйексөзді дәптер бетіне түсіру)

Оқиғаларды әңгімелеу (сұхбат)

«Отбасы татулығы» өсиет әңгіме

Баяғыда бір үлкен отбасы өмір сүріпті. Отбасындағы адамдар саны өте көп екен, бір қауым ел болып, бірге тұрыпты. Ол отбасы ерекше екен, отбасының өзара келісімде, татулықта өмір сүруі елді таң қалдырады. Оларда ұрыс-керіс, дау-жанжал деген атымен олмайды екен.Бұл отбасы жайлы патшаның құлағына да жетеді. Патша естігенінің ақ-қарасын білгісі келіп ауылға келеді. Ауыл тап-таза, барлығы да жеткілікті, тыныштық пен береке қонған. Патшаның көңілі толып, ерекше бір шаттыққа бөленеді. Сыйластығы жарасқан бақытты отбасында қариялардың орны төрде, уайым-қайғысыз, балалары бақытты, мәз-мейрам екен. Бұған патша таң-тамаша болады. Отбасының қалайша бақытты, тату-тәтті өмір сүруінің мәнісін білгісі келеді. Ауыл ақсақалына келіп отбасындағы татулық пен бірлікке қалай жеткендерін айтуын өтінеді.Қарт үнсіз ғана жүз рет «сүйіспеншілік», жүз рет «кешірім», жүз рет «бірлік» деп мұқият жазып шығады.Үш сөзді оқыған патша таң қалып:

- Осы-ақ па?

- Иә, - деді ақсақал. - Барлық жақсы отбасылары тек осы қасиеттерден құрылады, - деді де, сәл ойланып, «және шыдамдылық» деген сөзді қосып қойды.

Сұрақтары:

1. Отбасы жарастығы дегенді қалай түсінесіңдер?

2. Отбасы сыйластығына қалай қол жеткізуге болады?

3. Отбасы татулығы қандай табыстарға жеткізеді?

4. Сендер өз отбасыларыңда жақсы қарым-қатынас жасай білесіңдер ме?

5. Айналаңдағылармен дұрыс қарым-қатынас жасамаған кездерің болды мы?

Шығармашылық іс-әрекет, топтық жұмыс.

«Қарым-қатынас мәдениеті» тақырыбында

І топ Коллаж жасау

ІІ топ Сахналау

ІІІ топ Жағдаят шешу

Топпен ән айту.

Дуние керуен

1. Өтетін сейілмен,

Ей, дүние базарсың.

Пенделік пейілден,

Жүрегім тазарсын.

Қайырмасы:

Адамға бақ берер тек қана Аллам екен,

Өмірдің қызығы біреуге арман екен.

Мәңгілік тұрағың болатын бар ма мекен?

Бес күндік бұл дүние расында жалған екен!

2. Қуаныш, қайғының,

Бәрі де бітеді.

Бұл дүние таусылса,

Шын дүние күтеді.

Қайырмасы:

Адамға бақ берер тек қана Аллам екен,

Өмірдің қызығы біреуге арман екен.

Мәңгілік тұрағың болатын бар ма мекен?

Бес күндік бұл дүние расында жалған екен!

3. Амал қыл фәниде,

Иманның жолында.

Бәрі де, бәрі де,

Алланың қолында.

Қайырмасы:

Адамға бақ берер тек қана Аллам екен,

Өмірдің қызығы біреуге арман екен.

Мәңгілік тұрағың болатын бар ма мекен?

Бес күндік бұл дүние расында жалған екен!

Үй тапсырмасы.

Қарым-қатынас мәдениеті туралы эссе жазу.

Сабақтың соңғы тыныштық сәті.

Баяу әуен қойылады. Оқушылар денесін, басын тік ұстап, көзін жұмып отырады.

- Әрқайсымыз оң қолымызбен жүрегімізді ұстап көрейік. Өз жүрегіміздің жылылығын сезініп, жүрек жылуымызды адамдарға, айналамызға жеткізу үшін іштей оларға жақсы тілектер тілейік. Жақсы ой ойлайық, жақсы сөз сөйлейік, жақсы іс жасайық! Бүгінгі сабақтан алған әсерлеріңізді жүректеріңізге түйіп алыңыздар. Рахмет! Көздеріңді ашуға болады.

Сүйіспеншілік, сүйіспеншілік, сүйіспеншілік - бар жерде!

Сүйіспеншілік, сүйіспеншілік, сүйіспеншілік,-бүкіл әлемде!

Қолданылған әдебиеттер:

1. Өзін-өзі тану оқулығы . 7- сынып. Алматы 2010

2.Мұғалімге арналған әдістемелік нұсқаулық . Алматы 2010

3.Аңыз әңгімелер жинағы.