Конспект урока по крымскотатарскому языку 1 класс

Дерс мевзусы: О, о арифлерни язув. «ОРМАН», «ОЗЕН» сёзлернинъ талили. О арифи айры ве а арифнен берабер язмагъа огретюв.

Макъсат:

• Талебелерни О о арифлерни язмагъа огретмек;

• А арифнен берабер язмагъа огретмек;

• Сес-эджа талиль къабилиетини мукеммелештирмек;

• Огренювге меракъ догъурмакъ ве язувда джыйнакълыкъ тербиелемек.

Дерснинъ кетишаты.

1. Тешкилий дакъкъа.

2. Таянч бильгилерини актуаллештирюв.

1. Субет

- Хатырланъыз, насыл арифни окъув дерсинде огрендик?

- Онынъ акъкъында не айта билесинъиз?

2. Сёзнинъ сес-эджа талили.

Оюн «Эджалар къарма-къарышыкъ олып къалдылар»

ЗЕНО

ОМАНР

- Риджа этем, оларны ер-ерине къоюнъыз.

- «ОРМАН», «ОЗЕН» сёзлерини талиль этинъиз ве схемаларыны тизинъиз.

3. Дерснинъ мевзусыны ве макъсадыны еткизюв.

4. Янъы мальземени анълатув

1. Уфакъ о арифнинъ язылувыны талиль этюв ве анълатув.

Уфакъ о ариф бир элементтен ибарет - бу овал.

Иш сатырнынъ усттеки сызыгьындан азчыкъ ашаджа язмагьа башлаймыз. Сол тарафкъа тёгереклеп, иш сатырнынъ усттеки сызыгъынадже алып барамыз. Онъа токъунып, сол тарафкъа ашагъа тёгереклевни иш сатырнынъ ашадаки сызыгъынадже девам этемиз ве арифни язмагъа башлагьан ерине къалемни алып барып токътаймыз.

Бойле тактнен языла: «Ве-бир -ве».

2. Пармакъ гимнастикасы.

Пармакъларымыз юкьлап къалды

Юмрукъ олып топланды.

Бир, эки, уч, дёрт, беш-

Ойнамагъа истейлер.

Къомшуларны турсаттылар,

Тез уянды алты, ве еди,

Турды секиз, докъуз, он -

Кьаве истейлер эписи.

Юмрукъларны сыкъынъыз. Невбетнен онъ къолнынъ пармакъларыны догъурланъыз, текаран къыбырдатынъыз, пармакъларнен сол юмрукькъа къакъынъыз, сол къолнынъ пармакъларыны догъурланъыз, эки къолларныда къыбырдатынъыз.

3. Мустакъиль язув

4. Эки уфакъ оо арифни берабер язув ве оны а арифнен берабер язув.

5. Физдакъкъа.

6. «Буратино» оюны.

Буратино озь узун ошлу бурунынен ресим япа. Эписи мешгъулиетлер козьлер арекетинен япыла.

«Хавуч» - башны онъгьа-солгьа бурмайып, буруннен хавуч ресимини «япамыз».

«Терек» - алдына, артына эгильмейип, буруннен терек гесимини «япамыз».

3. Баш О арифнинъ язылувыны талиль этюв ве анълатув.

Баш О ариф бир элементтен ибарет - бу овал.

Тёпедеки ара сатыр сызыгьындан азчыкъ ашаджа язмагьа башлаймыз ве онынъ янында тёгереклеймиз, сонъра : къалемни иш сатырнынъ ашадаки сызыгьына юрьсетемиз, _анда кене де сагь тарафкъа тёгереклеп, арифни язмагьа башлангъан ерине алып барыга токътаймыз.

Ве-бир-ве» бойле тактнен языла.

7. Мустакъиль язув.

8. Дефтердеки вазифелернен чалышув.

9. Баш О арифни уфакъ о арифнен ве башкъа арифлеринен берабер язув

5. Дерснинъ нетиджеси.

-Насыл арифлерни язмагъа огрендик?

- Даа не яптыкъ?

- Бегенъдинъизми?