Тәрбие сағаты

Сабақтың тақырбы : Қош бол,бастауышым -балбұлағым.

Сабақтың мақсаты: Білімнің сара жолы мектептен басталатынын, білімнің кең дүниеде өмірге есік ашатынын сезіндіру. Білімге деген құштарлығын арттыру.Мектептегі білім ордасын, ұстаздарын құрметтеп, еңбекті бағалай білуге тәрбиелеу.

Оқушылардың төрт жылда қандай жетістіктерге жеткенін көрсетіп, өнер-білімдерін бағалау.

Көрнекіліктер: домбыра, интербелсенді тақта т.б

1.Кіріспе

Бұл оқу тамақ болар қарны ашқанда ,

Жол табар қараңғыда адасқанда.

Мал озбас біле білсең, білім озар,

Ақыры керек болар бір сасқанда -деп Міржақып ақын айтпақшы, тарыдай болып кіріп, ақыл- ойлары толысып, оң мен солын танып, жақсы мен жаманды айыра білуді үйренген шәкірттеріміздің ұйымдастыруымен өткізгелі отырған «Қош бол,бастауышы-балбұлағым» атты мерекесін бастауға рұқсат етіңіздер.

Толқимыз,толқып тұрсыз баршаңызда,

Мұндай күй болған сірә, қаншаңызда.

Қол соғып қошеметпен шақырайық,

Төртінші сыныпты ортамызға.

1.Білімді , ақылдысы сыныптағы,

Талай қиын есепті құрықтады.

Темірланның алдында талай іс тұр,

Болашақта жандырар үміт отты.

2.Іс келгенде алдына,

Жан салмайтын қызымыз.

Ер мінезді, көрікті

Ділназдай бар қызымыз.

3.Өзі сыпайы, үндемес,

Мінезіне ешкім тең келмес,

Үндемес қыз Жанельге

Сыныпта ешкім тең келмес.

1-жүргізуші: Қадірменді қонақтар!

2-жүргізуші: Қымбатты ұстаздар!

1-жүргізуші: Аяулы ата-аналар!

2-жүргізуші: Біз бүгін ең алғаш қалам ұстатып, әліппемізді ұсынған сүйікті ұстазымызға рахмет айту салтанатына жиналып отырмыз. Жанымызға білімнің жарық сәулесін сыйлаған мектеп-анаға алғысымызды айтамыз.

1 -бөлім: «Мектебім, менің мектебім»

1-оқушы: Мектеп деген білім кені, жыр кені,

Мектеп деген ғылымның ең үлкені.

Мектеп деген тәрбиеші адамға,

Мектеп деген даналардың мекені.

2-оқушы: Мектебім - білім берер алтын ұя,

Ер жетіп, сенде сөзім, артты санам.

Баулыған төрт жыл бойы ата-анамдай,

Әрқашан қасиетті атың маған.

3-оқушы: Армысың сен, алтын ұя - мектебім,

Саған айтар жыр, алғысым көп менің.

Жүректерге жаққан білім шырағын,

Мақтан етем, сені мәңгі, мектебім.

4-оқушы: Ұлылықты ардақ тұтар үнемі,

Алтын ұя, ақ босаға киелі.

Қанат қаққан, білім алып өзіңнен,

Күллі шәкірт саған басын иеді.

1-жүргізуші: Ия, балалар, дұрыс айтасыңдар. Мектебімізге қандай жыр арнасақ та жарасады. Бұл мектепте қаншама адам тәлім алған. Менің атам да, әжем де, әкем де, анам да, енді мен де мектепте тәлім алудамын. Сонымен «Мектебім» әнін қабыл алыңыздар.

2-бөлім: «Шуағын төккен төрт жыл»

2-жүргізуші: Біздің сыныптың оқушылары мектепте, сыныпта өтетін мерекелік шараларға белсене қатысады. Олай болса, құрметті ұстаздар, ақ пейілді ата-аналар, қонақтар, сондай бір қызықты сәттерге назар аударып, көз жүгіртейік.

(Интербелсенді тақтадан слайд көрсету. Оқушылардың мерекелік шараларға қатысуынан көріністер.)

1-жүргізуші: Кешегі кішкентай бүлдіршіндеріңіз бүгінде көптеген сайыстарға қатысып, үлкен жетістіктерге жетуде.

3-бөлім: « Біздің жетістіктеріміз» деп аталады.

(Оқушылардың түрлі сайыстардан алған мақтау қағаздарын, жүлделерін слайд арқылы көрсету )

4-бөлім: «Біздің шығармашылығымыз»

(Оқушылардың шығармашылық жұмыстарымен таныстыру. Жазған өлеңдерін оқып береді, салған суреттерін көрсетіп, таныстырады.)

2-жүргізуші: Биші қыздардың орындауында қазақ биі.

1-жүргізуші: «Ұстаздық еткен жалықпас ,

Үйретуден балаға»- деп Абай атамыз айтқандай алғаш қолымызға қалам ұстатып, оңымыз бен солымызды танытқан, бізбен бірге қуанып, әріптерді танытқан, білім нәрімен сусындатқан, мектептегі анамыз- ұстаз екені бәрімізге мәлім.

2-жүргізуші: Әр шәкіртін өз баласынан кем көрмей, оқуға, жазуға үйреткен мұғалім еңбегі шексіз. «Мұғалім- мектептің жүрегі»-деп Ыбырай атамыз бекерге айтпаған.

1-жүргізуші: Дұрыс айтасың, ғылым иесі ғалым да, ел қорғаған батыр да, тілінен бал тамған ақын да, жұмысшы да, ғарышкер де, бәрі-бәрі ұстаздан білім алған.

5-бөлім: «Ұстаздық еткен жалықпас,

Үйретуден балаға»

1-оқушы: Алғашқы ұстаз, ерекше тұлға дара шың,

Ұмытылмастай көңілде мәңгі қалатын.

Сағына әркез суреттерді парақтап,

Шәкірттерін жиі еске алатын.

2-оқушы: Мұғалім ұстазысың балалардың,

Болашақ ғалымдардың, даналардың.

Өмірде сенің алар орыныңа,

Бірі де жеткізе алмас бағалардың.

3-оқушы: Шәкірттер сіздерді айтып мақтанамыз,

Бейнеңіз жүректерде сақталады.

Біз әлі биіктерден көрінеміз,

Үміт пен сеніміңіз ақталады.

Хор: Мың алғыс сізге біздей түлектерден.

Мың алғыс мына отты жүректерден!

Ән «Ұстазым»

1-жүргізуші: Иә, міне сағымдай өте шыққан 4 жыл ішінде бізді ұстаз-анамыз сауатты, тәрбиелі, өнегелі етіп шығарды. Ендеше бастауыш сыныбымыз туралы неге айтпасқа?!

Домбырашылардың орындауында «Бастауышым-балбұлағым» әні.

Мектеп өмірінен қызықты көріністер.

2-жүргізуші: Біздің жамандығымызды жасырып, жақсылығымызды асырып жүрген біздің ата-анамыз. Қатарымыздың теңі болып, тамағымыз тоқ, көйлегіміз көк болып жүруі де ата-анамыздың арқасы.

6-бөлім: «Ата-анам- ақылшым»

Ән «Әке туралы жыр» , «Ана»

1-жүргізуші: Біз кезекті бастауыш сыныпты бітіретін түлектердің ант беру рәсіміне берсек.

Білім алуға

Үлкенді сыйлауға

Отанды қорғауға

Тіліміз бен салт дәстүрімізді сақтауға

Мәдениетті сақтауға

Үлгілі болуға

Ерінбей сабақ оқуға

Мектебіміздің даңқын көтеруге

Ант етеміз!

Мұғалімнің қорытынды сөзі, диплом тапсырылады. Ата-аналарға құттықтау сөз беру, бата тілеу.