Сценарий выступления выпускников на празднике Последнего звонка

Мезунлар байрамы - 2007

1.Етекчи: Сайгъылы мусафирлер! Азиз достлар! Чокъ эйи сёзлер айтылды, эйиджанлы дакъикъалар ис этильди.

2.Амма байрамымыз девам эте, ве санъагъа бугуньки куннинъ эсас инсанлары - мезунларны давет этемиз!

1.Буюрынъыз, мезунлар!

/Музыка янъгъырай, мезунлар санагъа чыкъалар, бир сырагъа я да ярым тёгерек шеклинде тизилелер. Учь мезун чыкъа/

I Кириш

1.Мына, сагълыкълашув вакъты кельди,

Окъув йыллары екюнленди.

Кетемиз тувгъан мектептен

Буюк аят бизни беклемекте.

2. Ёлумыз къолай олмаз, эльбет,

Керек олур чокъ арекет.

Къыйынлыкъларны эда этермиз,

Ниетмизге мытлакъ етермиз.

3. Бугунь азырмыз эпимиз

Чокъ шей сизлерге айтмагъа.

Сыджакъ, гузель, эйи сёзлер -

Сонъки куньде, сонъки сефер…

/ «Жёлтые листья» йырнынъ макъамына йырлана/

1.Тез кечти окъув йыллары,

Тез кечти окъув йыллары,

Нечюндир дуймай къалдыкъ.

Балалыгъымыз да кечти,

Балалыгъымыз да кечти

Энди ким оладжакъмыз?!

Багълама:

Мектеп йыллары,къуш киби, учып кетти,

Инанмаймыз, сонъки кунь де келип етти.

Мектеп чагъы ич бир вакъыт текрарланмаз,

Азиз мектеп, биз сени ич унутмамыз!

(Керек олса…)

2.До свиданья, наша школа!

До свиданья, наша школа!

Не скучай, не скучай!

Даже если не вернёмся,

Даже если не вернёмся

Вспоминай, вспоминай!

Багълама айны.

II Биринджи оджагъа багъышлана

/Учь мезун ортагъа чыкъа/

1.Биз кичкене экенде,

Окъувны бильмегенде,

Янымызда ярдымджы

Оджамыз эди биринджи.

2.Онынъ сёзю къанун эди,

Озю исе - нюмюне.

Ана киби, къймет эди,

Къойды темель бильгиге.

3.Азиз ве севимли оджаларымыз!

Эписи 11- А: Ленура Меметовна!!!

Эписи 11-Б: Тамила Диляверовна!!!

3.Биз сизлерни ич бир вакъыт унутмамыз. Джан юректен сизлерге

Эписи берабер: Сагъ олунъыз!!!

3. …айтамыз! Ве бу йырны сизге багъышлаймыз!

/ Эки талебе биринджи оджаларгъа чичеклерни берелер (бу арада эписи башлангъыч мектеп оджаларына чичек бермек мумкюн). «Азиз анам» йырынынъ макъамына йырлана/

1.Азиз оджам, сабырлыкънен

Элифбени огреттинъ.

Мерхаметли сёзлеринъден

Гонълюмизни котердинъ.

Багълама:

Сагъ олунъыз, оджапчемиз!

Элинъизни опейик.

Кедер дегиль тебессюмлер

Юзюнъизде корейик.

2.Ич бир вакъыт унутмамыз

Биринджи оджамызны.

Йыллар кечип, хатырлармыз

Экинджи анамызны.

Багълама айны.

III Ана тили оджаларына

1.Ана тили къырымларнынъ джаныдыр!

Ана тили къырымларнынъ къаныдыр!

Бу дюньяда ана тильнен барсынъ сен!

Ана тильсиз бу дюньяда ёкъсынъ сен!

2. Сайгъылы ана тили оджаларымыз, тувгъан тилимиз буюк къыйынлыкъларнен огренильгенини, озь Ватанымызда аджыныкълы алда олгъаныны биз анълаймыз ве билемиз.

3. Биз къырымтатар тилини севе ве урьмет этемиз. Бунъа сиз де себепчисинъиз. Амма сизге бир теклифимиз бар: тувгъан тилимизни башкъа фенлерни огреткен оджалармызгъа ве бизим ана-бабалармызгъа да огретсенъиз яхшы олур эди. Бельки о вакъыт ана тилимизни зиядедже къулланыр эдик.

2. Бу йыр сизлер ичюн, севимли оджаларымыз!

/ «Айшем» йырынынъ макъамына йырлана/

1.Оджа, оджа, сиздеки бильги бизде олайды,

Оджа, оджа, сиздеки бильги бизде олайды.

Бильги сизден, огренмеси бизден,

Огренмеге истек олайды.

Бильги сизден, огренмеси бизден,

Огренмеге истек олайды.

2.Оджа, оджа, сиздеки сабыр бизде олайды,

Оджа, оджа, сиздеки сабыр бизде олайды.

Сабырлыкъ сизден, инсафлыкъ бизден,

Не де гузель дерслер олурды!

Сабырлыкъ сизден, инсафлыкъ бизден,

Не де гузель дерслер олурды!

3.Оджа, оджа, миллий дуйгъу алдыкъ дерслерден,

Оджа, оджа, миллий дуйгъу алдыкъ дерслерден.

Тилимиз - Къырым! Ватанымыз - Къырым!

Олерик, айырылмакъ миллеттен!

Тилимиз - Къырым! Ватанымыз - Къырым!

Олерик, айырылмакъ миллеттен!

4. Азиз ана тили оджаларымыз: Урхие Алиевна, Венера Сейдаметовна, Диляра Айяровна! Бизден сизге сыджакъ

Эписи берабер: Тешеккюрлер!!!

/Ана тили оджаларына чичеклер бериле/

IV Рус, украин, инглиз тили оджаларына

/Учь талебе чыкъа/

1.Бир заманда «тувгъан» эдинъ,

Эй, эджнебий «татлы» тиль!

Манъа джанынъ агъырмасын,

Ана тилим - къырымдыр!

2.Бу фикирни гедже-куньдюз

Озь-озюме айтсам да,

Къырымтатар олгъанымны

Бильсем, сезсем, анъласам да,

3.Юрегимде сен де барсынъ,

Эй, эджнебий, «татлы» тиль!

Бунъа себеп чокъ олса да,

Бир данеси - оджамдыр!

/Бир талебе даа къошула, достларына анълаткъан шекильде айта/

4.Бу дюньяда ким олсанъ да,

Бильмелисинъ эр заман:

Девлет тили украиндир,

Миллетара - рус тили,

Халкъара къонушмагъа

Инглиз тили керекли!

1.Урьметли Назмие Муратовна, Эльвира Лензиевна, Гульсем Джевдетовна, Урхие Алиевна! Сизге миннетдарлыгъымызны бильдирип, бу йырны багъышлаймыз.

/Украин, рус, инглиз тили оджаларына чичеклер багъышлана. «Надежда» йырынынъ макъамына йырлайлар/

1По-русски говорить умеем мы,

Мову разумiйем украiнську.

Если иностранца встретим мы,

То заговорим с ним по-английски.

И язык турецкий по плечу,

Белоруса без труда поймём мы.

Польские друзья приедут вдруг,

То общенье будет без проблемы.

Припев:

Поверьте, язык свой родной

Знать мы должны непременно.

Но счастье - язык знать чужой

И мир познавать интересней!

Поверьте, язык свой родной

Знать мы должны непременно,

Но счастье - что в школе родной,

С другими языками нет проблемы.

V Эсап, физика, информатика оджаларына

/Дёрт талебе левха шеклинде чыкъыш япа/

1. - Мурат, айтчы, къайсы фен муимдже: тиль я да эсап?

2. - Эльбет, тиль.

1. - Я пара саяджакъ олсанъ? Я эв къураджакъ олсанъ? Узунлыкъны, тезликни, агъырлыкъны ольчейджек олсанъ? Эгер чызмагъа, саймагъа бильмесенъ, техниканен насыл анълашаджакъсынъ?

2. - Я лаф этмеге бильмесенъ, сайгъанынъ къач капик?

3. - Эй, вазгечинъиз! Эр бильгининъ, яни эр феннинъ озь къыймети бар, эр бир фен озюджесине муим.

4. - Амма биз ойле заманда яшаймыз ки, эр бир адымынъны эсап-китап япмакъ керек. Айткъан эди оджамыз: «Эсап - фенлернинъ падишасы!..»

3. - Ойле исе, физиканен информатика везирлерими?!

1. - Я сен не беллединъ?!..

/ «Учь къуш эдик, учар эдик авда…» йырнынъ макъамына йырлайлар: 2 - 3 бала 1-нджи бейитни йырлай, оларгъа къаршылыкъ киби, сырадан 3-4 мезун даа чапып чыкъа ве экинджи бейитни йырлайлар/

1.Учькошелик сыздыкъ бизлер тахтада,

Сюйрю коше я да токъал - исбатла!

Яздыкъ мисаль - бельгисиздир азасы,

Джаным оджам, не къылынув бу аслы?!

2.Эр бир ишни эсап-китап япмалы,

Нетиджеси джевабына бакъмалы.

Эсапламакъ бильмегеннинъ зор алы,

Ич бир вакъыт оламаз о, паралы.

5. Биз исе эсапны ве онынъ «везирлери» физика ве информатиканы яхшы огрендик, орталыкъта къалмакъ!

6. Фатиме Меметовна, Эльвира Эюповна, Лиля Мустафаевна, Эльдар Ахмедович! Сизге алгъышларымыз!

Эписи: Чокъ яшанъыз!!!

/Оджаларгъа чичеклер берилле/

VI Тарих, джогърафия, инсан ве джемиет оджаларына

/Эки мезун ортагъа чыкъа /

1. - Зенуре, мен масал пек севем, я сен?

2. - Эльбет. Масалны ким севмез?

1. - Я тарихны? Анам бир айткъан эди, тарих масал киби бир шей деп. Ойле олса, эр кес тарихтан «12» алыр эди, ойлеми?

2. - Билесинъ, ананънынъ айткъаны догъру: тарихнен масалнынъ фаркъы пек аз - масаллар къыскъа-къыскъа, сонъу исе эр вакъыт бахтлы ола; тарих исе бильмем насыл заманлардан башлана, сонъу да крюнмей. Эр йыл - бу тарихнынъ бир парчасы.

1. - Бу йыл да тарихмы?

2. - Мына, бугунь мектеп чагъымыз тарих олды, демек мумкюн.

1. - Ана санъа! Алиме Усеиновна! Тарих масал киби олгъаныны бильсем, эр бир дерске азырланыр эдим!

/ «Сыра, сыра джезвелер»нинъ макъамы янъгъырай, мезунлар йырлай/

1.Сыра, сыра джезвелер къайнаюр, къайнаюр /2 кере

Алименинъ дерслери, энъ муим, эсастыр / 2 кере

Багълама:

О-о-оф!

Чанъ чалды - дерске чап!

Чанъ чалды - дерске чап!

Кечке къалсанъ, оджа дерске къоймайджакъ!

2.Алиме Усеиновна!

Эписи: Сагъ олунъыз!!!

2.Биз Сизни севемиз!

/Оджагъа чичеклер бериле. Эки мезун девам эте/

3. - Бу йыл биз даа бир аджайип феннен таныш олдыкъ.

4. - Оджа да аджайип эди.

3. - Догъру айтасынъ, инсан ве джемиет дерслеринде оджамыз бизни янъы яшайышкъа азырлады.

5. - Я ким бизни дюнья къурумынен, чешит къыталарнен ве табиат муджизелеринен таныш этти?

6. - Джогърафия дерслеринде огрендик, эльбет! Сайгъылы оджаларымыз: Мери Усеиновна, Мерьем Ибраимовна! Бизден сизге чокътан-чокъ

Эписи: Сагъ олунъыз!!!

VII химия, биология, аят къорчалавы, МСП, ЗО оджаларына

/ «Султание» йырынынъ макъамы янъгъырай. Мезунлар йырлай/

1.Не гузель паралы олсанъ,

Парагъа эр шей алырсынъ.

Амма сагълыгъынъ олмаса,

Паранынъ олмаз файдасы.

Багълама:

Сагълыгъымыз - байлыгъымыз

Озюмизнинъ къолумызда.

Буны бизге анълаттынъыз

Дерслернъизде оджалармыз. /багълама 2 кере текрарлана

1. Бу оджаларнынъ адлары: Зарема Юсуфовна ве Саиде Усеиновна!

2. Шевкие Муртазаевна!

3. Джеваир Мустафаевна ве Лёман Сеитвелиевич!

1. Нени ненен къарыштырсанъ,

не оладжакъны…

2. Бир ерчигинъ агъыргъанда,

себебини тапмакъны…

3. Эм озюнънинъ, эм инсанларнынъ

Аятыны къорчаламакъны…

1. Биринджи ярдымны япмакъны…

2. Керек олса, Ватанны да къорчаламакъны огреткен оджаларымызгъа:

Эписи: Тешеккюрлер!

/Оджаларгъа чичеклер берилле/

VIII Эмек, беден тербиеси, тасвирий санат, музыка оджаларына

/Дёрт мезун ортагъа чыкъа/

1.Белли классик айткъан эди: «Инсанда эр шей дюльбер олмакъ керек: эм юзю, эм урбасы, эм къальби, эм фикирлери…». Бакъынъыз, мектепте бизни дюльбер инсанлар олып осьмемизге ярдым эткен махсус фенлер бар экен, биз исе буны энди анъладыкъ.

2. - Эльбет, дюльбер олмакъ ичюн, биринджиден, сагълам олмакъ керексинъ - «Сагълам беденде - сагълам рух» - беден тербиеси не къадар керекли дерс!

3. - Я маймунны инсангъа не чевирген? А-а-а! Обратный процесстен Алла сакъласын! 11 йыл эмек дерслерине нафиле къатнамадыкъ…

4. - Не алякъасы бар, Алим! Эмек, эльбетте, керекли дерс. Бакъ сен: озь козюнънен гузеллики корьмекни, озь къолунънен оны япмакъны, динълемеге бильмекни ве севинмекни де ильки мектепте башладыкъ.

1. -Тасвирий санат ве музыка дерслери акъкъында айтасынъмы?

4. - Эльбет те!

3. Шунынъ ичюн оджаларымыз: Лёман Сеитвелиевич ве Сергей Николаевичке!

4. Гульнара Нуриевна, Гульнара Иззетовна ве Лилия Зекерьяевнагъа бизим сыджакъ алгъышларымыз!

2. Оларнен бир сырада бизим даимий ярдымджымыз, «китап дюньясынынъ» саиби - Ление Шевкиевнагъа - чокътан-чокъ сагъ олунъыз айтамыз!

Эписи: Сагъ олунъыз, оджалар!!!

1.Бу йырны сизге йырлаймыз!

/ Оджаларгъа чичеклер бериле. «Улыбка» йырынынъ макъамы янъгъырай, мезунлар йырлай/

1.Къаршылайлар урбагъа бакъып;

Байнынъ ёлу чокъ ерге ачыкътыр;

Лякин ничюн, эр шейи олып,

Акъикъий бахтлары ич де ёкътыр?

Багълама:

Эгер сен сагълам олсанъ,

Сайысыз достунъ олса,

Мерхаметли юрегинъ,

Чебер эллеринъ,

Севинсен сен кунешке,

Къушларгъа, чичеклерге, -

Бу дюньда эр кестен

Бахтлы олурсынъ!

IX Мектеп хадимлерине

1.Татлы-дамлы ашамагъа биз севемиз,

Аштан сонъра, татлы сувны бегенемиз.

2.Ашап-ичип тойгъан сонъ да, кейфленемиз:

Къавурулгъан семичканен эгленемиз.

3.Амма саба биз мектепке кельгенде,

Ола эр ер дюльбер ве темизленген.

4.Чюнки дайим бизнен азиз инсанлармыз,

Мектеп ич те яшап олмаз оларсыз!

5.Багъышланъыз! Саг олунъыз,

Тата, абла, аптелер!

6.Къорчалагъан, соба якъкъан

Агъалар ве эмджелер!

7.Айры алгъыш - тётя Фая-буфетке,

Ашханеде чалышкъан хадимлерге!

Эписи: Миннетдармыз сизлерге!

X Мемуриетке, Эмираджиев Эбазер бейге ве анна-бабаларгъа

1.Эр махлюкънынъ башы бар,

Эр бир ишнинъ башлыгъы,

Командары, капитаны,

Муим, эсас инсаны.

2.Мектепнинъ де эр куню

Озь башына ёнемез,

Мудир япкъан ишлернинъ

Эсабы ёкъ, ольченмез.

3.Мудирге ярдым этмек

Муавинлерге эманет.

Байрамларны азырлагъан

Оджалар да бар, эльбет.

4.Мектептен сагълыкълашамыз,

Эр кеске «Сагъ ол» айттыкъ.

Мемуриетимизге исе

Айыры алгъышлар ляйыкъ!

1.Урьметли Айше Абдужелиловна!

2. Левае Шукриевна ве Эльмра Кемаловна!

3. Энвер Феритович ве Фериде Саидовна! Бу алгъышлар сизлер ичюн!

/Чичеклер бериле/

5.Даа бир инсан бар шеэримизде,

Джан юректен ярдым япа бизлерге.

Ким о, зор дегиль анъламагъа

Эписи берабер: Эмираджиев Эбазер агъа!!!

5.Бинъ эйиликнен сизге къайтсын,

Чокъ разымыз!

4.Джан юректен айтамыз

Эписи берабер: Сагъ олунъыз!!!

/Чичеклер бериле/

6.Энъ азиз инсанларымыз, севимли ана-бабаларымыз! Сиз олмасанъыз бугуньки байрам олмаз эди. Биз олмаз эдик!

7.Сизни пек севемиз! Къавий сагълыкъ ве узун омюр тилеп, элинъизни опемиз!

XI Cыныф реберлерине - сёзлерни талебелер озьлери азырлай биле

1. Сыныф реберлеримизге ве Мектебимизге сонъки йырымызны багъышлаймыз

Мезунларнынъ йыры

/макъамы

Окъувымызнынъ

сонъки куньлеринде

бирден анъладыкъ -

генчлик екюнленди.

Мектеп битирсек,

Беклей бельгисизлик.

Насыл яшайыш

къаршылайджакъ?!

Этрафымызда -

Аджайип табиат,

Тылсымлы баарь,

Муджизели аят.

Догъмушларымыз,

Достларымыз бизнен.

Дайима оладжакъмы экен ойле?

Багълама:

Биз истер эдик:

Омюр узун олсун;

Келеджегимиз

бахтлы ве тынч олсун;

Ана-бабалар

гъурурлансын бизнен;

Къартлар раат олсун;

Халкъымыз бар олсун.

Биз истер эдик:

Акъикъат тикленсин;

Ватанымызда

байрагъымыз ельпресин.

Бизим арзумыз -

Бахтлы омюр

Ана-топрагъмызда!

Сценарийни азырлады Эски Къырым миллий мектебининъ оджасы Абдуллаева У.А.