Литературно - музыкальная композиция

Литературно - музыкальной композиция

«Тиринь келесь - минек сюпавчинек!»

Бажамось: невтемс тиринь келенть мазычинзэ, эрямокинзэ ды эрявиксчинзэ Мордовия Республикань лия раськетнень эрямонь койтнесэ.

Вешематне:

- тонавтницятнень оймес вельмевтемс тиринь келентень вечкема;

- тонавтомс тонавтницятнень чарькодеме сень, што эрьва эрикс валось тиринь кельсэ ловови покштояк покш сюпавчикс;

- тонавтницятнень кастомс мелест ды бажамост тиринь келенть сюпалгавтомантень ды ванстомантень;

- тонавтницятнень кармавтамс арсеме седе, што тиринь келенть эрямокись ули тиринь масторонть ванстыцякс.

Оборудованиясь: презентация, кедьчелькень теевкс, кезэрьпингень кудоютконь кедьёнкст, викшнезь нардапацят.

Эрьгелеманть молемась:

1 ветицясь: Шумбратадо, оят!

2 ветицясь:Шумбрачи весенень, кить пурнавсть течи те кужонтень!

1 ветицясь: Течинь вастовоманок алтасынек эрзянь келентень!

2 ветицясь: Эрзянь кель, тонь ине оймень виенть

Авань моротнестэ саинь мон.

Седе гайтев эзинь марсе лия

Ды а содан седе чевте, ён.

1в. Эрзянь кель мон кенярдан тонь кисэ.

Ламо масторт содыть тондеть ней

Эрзянь кель, тон - мазый цецянь кизэ.

Эрзянь кель, тон Равов прыця лей.

2в. Эйкакшт, кода арсетядо, мекс истя питней тиринь келесь?

1в. Сон питней, мекс пингеде пингес эйсэнзэ кортасть минек покштянок - сырькаенек, сынь пачтизь келенть вельде неень шкас кезэрень пингень моротнень, ёвкстнэнь, койтнень - кирдатнень. Масторонть лангсо ламо ломанть, сынь весе явовить эсест раськева. Эрьва рськенть эсензэ тиринь келезэ.

2в. Минь тынк марто чачинек Эрзянь Масторс, тиринь келенек - эрзянь!

1в. А ней кунсолосынек моронть «Эрзянь кель», кона ламо иень перть ловови эрзянь келень гимнакс. Сонзэ сёрмадызе Серафима Марковна Люлякина.

№ Моро «Эрзянь кель»

2в. Минек келенть туртов эрзянь мерить

Ды совавтыть сонзэ Равонь пусмос,

Финнэнь - угрань семиясо эри,

Башкакс ашти комсешкатнень ютксо.

1в. Ушодызь эрямост кельтне весе

Раськень чувтосто - вейке келень юрсто,

Минек келенть - башка тарадкезэ,

Эсензэ тарказо лиянь ютксо.

№ Стихотворения «Монь велесэ»

№ Нурька морынеть

2в. Кортакшность ве кельсэ эрзят - мокшот,

Сынь лемдильть мордовской вейсэнь келекс.

Финэнь - угрань раськень ней чувтосонть

Аштить ве тарадонь кавто пенекс.

1в. Эрзянь эйкакш корты тиринь кельсэ,

Прок нармунне тунда сон моры.

Баягинекс гайги вайгелезэ,

Теке горниповне чольдерди.

№ Моро «Инжень вастома»

№ Стихотворения «Седейсэнь вейке мелявтома»

2в. Эрзянь кель, тон валскень зоря,

Норовжорчонь гайть,

Тон певтеме мазый моро,

Кельме ведень тансть.

1в. Монь кезэрень эрзянь кель!-

Тонь валтнэнь смустьсэ коень - кирдань валдо,

Ды улемс эрзякс а ютыця мель,

Зярдо виензы эрямось Эрзянь Масторсонок!

№ Стихотворения «Тиринь мастор»

№ Моро «Эрзянь карть»

2в. Зярдо мазый эрзянь морось гайги,

Сон весемень велькссэ теште прок,

Апаротнень васов шашты, айги,

Полавтнесы пертьпельксэнть допрок.

1в. Кепети ды касы яла мелем,

Зярс а пры сон тумо прясто сэрякс:

Чилисемам, нармунень, менелем

Кортыть мартон тиринь кельсэ - эрзякс!

№ Стихотворения «Кикс улян?»

2в. Энялдан тенть, теште,

Тон мелем витьсак

Вечкемадо мештем

Течи пряс пештьсак.

1в. Ули, теште мелем

Ёвтан тонеть вал:

Мазый эрзянь келем

Кадык эри свал!

№ Стихотворения «Ливтясь гулькине»

2в. Келесь - сехте кеме

Сюлмо, сехте эрикс,

Коната свал вейсэнди раськенть

«Бути ёми келесь, народось уш а ули»,

А стяко кортыть теде ломанть.

1в. А стяко кортыть :

А онкстави сень питнезэ,

Кона пек вечки чачома келензэ.

Тиринь келесь седей эжди,

Вансты зыяндо ды кежде.

№ Стихотворения «Кикс улян»

№ Сценка «Лездыцят»

2в. Тиринь келем, мекс тон жойнят жойсэ,

Ансяк эйсэть ёвтави мелем.

Эсеть вийсэ, мазычисэ, койсэ

Панжить тенек аволь вейке лем.

1в. Сынст ютксо Доронин ды Пиняев,

Моро ды Мартынов, Гребенцов

Гайни ды Люлякина, Тяпаев,

Эрзянь валдо оймесь Журавлёв.

№ Стихотворения «Эрзянь ава»

2в. Весе эрзянь вийсэнь

Яван тонеть мель.

Эряк шумбрачисэ,

Мазый, гайги кель.

1в. Ванькс тонь сёлмов ойметь

Валдо прок менель,

Вечксынь вадря коеть,

Тиринь эрзянь кель!

№ Музыкальной композиция «Тундонь налксемат»

2в. Сравтозь эрзянь мастором келейстэ:

Викшнезь руця, питней мода панкс!

Ашти тесэ менелесь сэрейстэ,

Пеедиця, валдо ды пек ванькс.

1в. Эрьванть туртов покш уцяска казят.

Тонь кондямо омбоце арась.

Лугат, виреть весемеде мазыйть.

Вановтом сэнь ведезэть ваясь

№ Моро «Эряк, тиринь мастор!»

2в. Зярдо тиринь эрзянь морось гайги,

Сестэ, алкукс тееван ломанькс.

Лопанть лангсо цитнезевсь ведьбайге-

Эрзянь моронь оймесь истя ванькс.

1в. Зярдо зыянось инжекс сы монень,

Кельме пиземекс чамазон петни,

Эсень кельсэ мон пшкадян Пазонтень

Сон монь кедьбеде валдонтень вети.

№ Моро «Тиринь веледе».

2в. Лемень рисьменть, нама, пезэ арась.

Седеезэст Пазось сятко путсь.

Эрьвась вельдеть содавиксэкс кармась,

Пачкодсь тёкшос, мель путома мусь.

1в. Эрзянь лемденть каштанчим а сёпса:

Ламо покш ломаненек минек

Эрзянь раськень цёрат Степан Эрьзя

Кемекстызе леметь сехте пек!

№ Стихотворения «Степан Эрьзя»

2в. Тиринь кельсэ мельть - арсемат кодан,

Кортан малавиксэнь мартом он,

Сонзэ вельде рузонь келенть содан.

Сехте чарькодевикс монень сон.

1в. Чапамось седеем кери,

Ашти оймесэнь монь ризкс:

Эрзянь мастор, эрзят эрить, -

Эрзякс кортамс тенек визькс.

№ Сценка «Каваникивай»

2в. Сюпавчи народонь,

Оймень лисьмаприне -

Тетянь - авань эйстэ марязь валось -

Пингезэть кадови - а стувтови,

Сонзэ вельде шкатнеяк сюлмавозь.

1в. Кастасынек келенть

Весе эрзянь вийсэ-

Ютасынек а стяко эсь кинть,

Ванстасынек келенть

Седей - оймень псисэ,

Сон эсь вийсэ ванстасмизь минек!

2 в. Виеть тонь а машты, а синдеви.

Тиринь мастор, максан эрзянь вал:

- Косо мезе илязо тееве,

Ансяк тон седейсэнь улят свал!

1в. Вана пачкодсь пнс минек вастовоманок. Илинк стувто тиринь келенк! Зярдояк илядо визде кортамс эснек кельсэ. Содадо, сон сехте питней, сон сехте мазый!

2в. Вастомазонок!

</<br>

7