Тәрбие сағаты 'Қош бол, әліппе!'1 Сынып

«Әліппе деген алтын жол,

апарар сені алысқа»

1 «Ә» сынып мұғалімі: Сердалинова .Г.Х

Мақсаты: Оқуға, білімге деген сүйіспеншілігін арттырып, отансүйгіштікке

тәрбиелеу.

Оқушылардың әліппеден алған білімінің тәрбиелік мазмұнын ашу.

Оқушылардың эстетикалық талғамын ұластыра түсу.

Көрнекі құралдар: «Қош бол, сүйікті Әліппе!», «Білім кілті - Әліппе!», «Оқысаңыз балалар, Шамнан шырақ жағылар» көрнекі суреттер, шарлар, әріп белгілері.

ән: «Мектепке барамын» музыкасы ойнап тұрады.

(Ақсақал рөліндегі бала немере-оқушысын жетектеп шығады.)

Автор:

Жеті жасар баласын,

Жетпісте шал жетектеп.

Келе жатыр көшеде,

«Қайда әлгі мектеп»-деп.

Жетпіс келед сүрініп,

Жеті келед жүгіріп.

Бейнетаспа тыңдау «1-қыркүйек»

Ата:

Балам, балам, жақсы бол,

Міне, сенің мектебің.

Сабағыңа зейін сал,

Ақылды бол, тентегім.

Немере:

Қыркүйекте келдім де

Сыныпқа кірдім қуанып,

Қарсы алды ұстаз мейіріммен

Қадамымды құп алып.

Ата:Балам,зейінді бол,бүгіннен бастап оқушы атандың.

Қалқам, немеремді өзіңе тапсырдым.

Слайд шоу «4 ай өткен соң»

Мұғалім:

- Сәлеметсіздер ме, құрметті ұстаздар, ата-аналар.

Бүгінгі егемендігіміз ескеріліп, тәуелсіз тұлпардай етек-жеңіміз кеңейіп,Тәуелсіздігіміздің 20 жылдық мерей тойымен тұспа-тұс келіп отырған,бүгінгі күн сіздер үшін тағы бір той қосылмақ.Бұл той балаларыңыздың тұсаукесер тойы.

Бүгінгі шәкірттердің алғаш қолдарына алған оқулығы - әліппемен қош айтысар кезі келді. Білім әлемінің беташары - Әліппені табысты аяқтауымен құттықтаймын.

Ортаға сүйікті оқулығы әліппемен қоштасқалы тұрған 1»Ә» сыныбының шәкірттерін шақырайық.

1-жүргізуші:

Ассалаумағалейкум, уа, халайық!

Армысыздар, аналар,

Бармысыздар, балалар,

Сөзіме құлақ салыңыз,

Бір серпіліп қалыңыз.

Әліппеге арналмақ,

Бүгінгі жыр,әніміз!

2- жүргізуші:

Өтті оқу сан сабақ,

Бүгін үлкен салтанат.

Оқулықпен достаспақ,

Әліппемен қоштаспақ.

Өсті білім, ойымыз,

Құтты болсын тойымыз!

1-жүргізуші:

Қымбатты балалар!

Біз кітап пен журналдарды оқи алатын болдық. Бұл білімді бізге не үйретті?

Бірге: Әліппе досымыз!

2- жүргізуші:

Иә, ендеше сүйікті әліппемізді ортаға шақырайық. (Әліппе келеді) Әліппе 3 рет

-Сәлеметсіздер ме, балалар!

Бірге: Қош келдіңіз, Әліппе!

Әліппе:Армысыңдар, жас достар!

Армысыңдар, ата-ана!

Болашаққа жол ашар,

Әліппе келді ортаға.

Білім деген ғаламның,

Әліппесін меңгерген.

Келешегі қазақтың,

Басталады сендерден.

Жақсы білім-көрімдік,

Болсын сізге халайық.

Не үйрендік, не білдік,

Қане, ортаға салайық!

1-оқушы:

Әліппем, менің әліппем,

Сені қолға алып мен.

Есігін аштым мектептің,

Ертеңгі сәуле жарықпен.

2-оқушы:

Келгенде алғаш мектепке,

Білмеуші едік әріп те,

Оқимыз қазір ертек те,

Үйреткен оны Әліппе.

3-оқушы:

Енді біз жаза білеміз,

Әріпті қосып әріпке

Риза боп саған жүреміз,

Сүйікті біздің, Әліппе!

ән: «Әліппе» (АНА, БАЛА, ОТАН шарға жазылған сөздерді жоғары көтеру)

1-жүргізуші:

Енді ортаға әріптерді шақырайық.

1-оқушы:

Қ әрпінен құралған

Бас-аяғы қазақтың,

Жарылқасын бір Аллам!

2-оқушы:

Алатаудай айбарлы,

Астанам аты - Астана.

Ақтауым - ару жас қалам,

Жасай берсін Азат күн!

Мына менен басталған.

3-оқушы:

Зергерлікті кім білер,

Балқытады күмісті.

Сақинаны, сырғаны,

Күміс сымнан тартады.

4-оқушы:

Ата-ананың тілегі -

Адам болып өскенің.

Адамдықтың тірегі-

Адал болып өскенің.

5-оқушы:

Қиындықтан қорықпа,

Қаймығып еш торықпа.

6-оқушы:

Сара сауды сиырды,

Сексеуілді сындырды.

Сазан балық қырда,

Сан шаруаны тындырды.

7-оқушы:

Таңнан тұрып тай мініп,

Тауда тазы жүгірттім.

Таңқурай жеп, сай қуып,

Таңдайымды жібіттім.

8-оқушы:

Астана -астанам,

Астана - бас қалам.

Ардақтап атыңды,

Аузымнан тастаман.

9-оқушы:

Наркөз бота үнемі,

Нарға ілесіп жүреді.

Нағыз еңбек кепілі,

Нан - тіршілік тірегі.

10-оқушы:

Бірқазан мен Бөдене,

Байқамады дәнеңе

Бүркіт аңдып екеуін

Бастамақ бір пәлені.

11-оқушы:

Оспан да өлең жаттады,

Олжас та өлең жаттады.

Мына менен басталған

Екеуінің аттары.

12-оқушы:

Лайым ұлы іс болсын,

Лайықты шәкірт болсын.

Лұқпан, Хакімдей боп,

Лайым қыдыр қонсын.

13-оқушы:

Асыл сөзді іздесең

Абайды оқы, ерінбе,

Адамдықты көздесең,

Жад тоқып ал көңілге.

14-оқушы:

Шілде күні керемет

Шабындыққа келе кет.

Шалғышылар-ағалар

Шөмеледе балалар.

15-оқушы:

Азаматпын жатпаймын

Алма ағашты баптаймын.

Астанада тұратын

Ағама алма сақтаймын.

16-оқушы:

Ғимарат көп қаламда,

Ғаламат көп ғаламда

Ғылым қуып жалықпай

Ғалым болам қалайда.

17-оқушы:

Ырыс алды -ынтымақ,

Ырысты болсын еліміз.

Ықыласы зор іске

Бала болып өсеміз.

Әріп таңбаларынан қалпақ киген оқушылар тізіліп тұрады.

1-жүргізуші:

Балалар, мына әріптерде бір сыр бар тәрізді, қане кім байқады?

-Қазақстан болашағы. «Біз»

Хор: «Достық»

Ән: «Радуга» Бут Анна.

Мұғалім: Әр жігіттің үш жұрты бар.Әліппенің де үш жұрты бар.

1.Өз жұрты: Дауысты дыбыстар

2.Нағашы жұрты:Дауыссыз дыбыстар

3.Қайың жұрты: ь ъ белгілері.

Ата-анамен жұмыс

Ойын:«Егер мен болсам»

Би:«Микки Маус» бір топ қыздар.

1-оқушы:

Алфавиттің А тұрады басында,

Әрқашанда Ә тұрады қасында.

Байқадың ба, Б тұрады үшінші,

Ал осының сыры неде түсінші.

2-оқушы:

А- деген ол аналар ғой ардақты,

Ә - деген ол әкелер ғой салмақты.

Б - деген ол балалар ғой әдемі

Алшақ кетпей сондықтан да расында,

Тұрады олар алфавиттің басында.

2-жүргізуші:

Балалар, айтыңдаршы, қазақ балаларына алғаш әліппені жазған кім?

Бірге: Ыбырай Алтынсарин.

-Ыбырай аталарынның қандай өлеңдерін жатқа білесіңдер?

«Кел,балалар,оқылық!»

1-жүргізуші:

Әліппемен қош айтысып қаламыз,

Енді қолға басқа кітап аламыз.

Ата-ана қуанышқа ортақ бол,

Сауатты болып шықты, міне балаңыз.

Әліппе:

Ризамын балалар,

Меңгердің, болмадың босқа тер.

Ана тілі атты әпкем бар

Сендерді жетелеп әкетер.

Ортаға ана тілі келеді.

Ана тілі:

Сәлеметсіздер ме, балалар?

Бірге:

Қош келдіңіз, Ана тілі.

Ана тілі:

Сөйлетер сөзді шеберлеп,

Өзіңнің ана тіліңмін.

Байыптап жақсы оқысаң,

Негізі менде білімнің.

Ана тілің - құралың,

Ана тілің - ұраның

Ана тілің болмаса,

Мықты болмас тұрағың.

Мұғалім:

Ата-бабамыз ежелден 3 нәрсені бой тұмардай қасиет тұтып, қадірлеп өткен. Ол -ел, жер және тіл. Ана тілі-әр халықтың төл белгісі.

Адам білімді, тәлім-тәрбиені -тіл арқылы үйренеді.Ана тілі деп атаудың себебі - анасындай қастерлесін дегені. Өз анасын сыйлайтын әр адам өз тілін де құрмет тұтып жүреді.

Аяулы жыр-әніміз

Аялайтын бәріміз.

Алу үшін сана-білім

Ардақтаймыз ана тілін.

Ән:«Ойлан,тап» Сейтенова Ж. Аркешев Д.

3-оқушы:

Ақыл-ойын даланың,

Ана тілден аламын.

Ана тілім ардақты,

Ақ сүтіндей анамның.

4-оқушы:

-Ана тілің - арың бұл,

Ұятың боп тұр бетте.

Өзге тілдің бәрін біл,

Өз тіліңді құрметте.

Әліппе:

Оқуда зейінді болыңдар,

Еңбекке бейімді болыңдар.

Кір шалмасын қабақты,

Ақ жол болсын балалар.

Оқығандарың есте болсын

Күнделіктерің беске толсын.

-Ал балалар сау болыңдар!

-Қош болыңыз (Бәрі бірге)

2-жүргізуші:

Балалар, сендер аз ғана уақыттың ішінде көп нәрсені - оқуды, жазуды, есептеуді меңгердіңдер. Осының бәрін кім үйретті?

Бірге: Мектеп, әліппе, ұстаз, ата-ана.

Ән: Атам,әжем. Сарсен Алдияр. Қонысбек Нұрсәулем.

5-оқушы:

Әліппе, даңғыл жол ашты,

Жаңа пәнмен жалғасты.

Әліппе сырын ұқтырған

Рақмет, ұстаз алғашқы.

6-оқушы:

Біз енді Әліппемен қоштасамыз,

Жолына гүлмен қоса жыр шашамыз.

Білімнің бұлағынан сусындауға,

Көптеген кітаптармен достасамыз.

Хор: «Туған ел»

1-жүргізуші:

Әліппемен қош айтысып қаламыз,

Енді қолға басқа кітап аламыз.

Ата-ана, қуанышқа ортақ бол

Сауатты боп шықты міне балаңыз.

Бата тілек ( Сарсен папасы )

Әліппенің бетін жарық ет,

Ұл-қызды түгел білімді ет.

Келесі оқу жылына,

Аман-есен түгел жет!

«5» болсын алар бағамыз,

Біліммен бақыт табамыз,

Өнер-білім көп оқып.

Өсе берсін санамыз!

Әумин!

2-жүргізуші:

Бүгінгі кеш әр үйдің « Той басы» деп саналар.

Балалардың есімі әулеттерге таралар.

Ырым етіп сондықтан ертеңгілік соңында,

Ақ тілекпен баршаға тілек айтар қонақтар.

Шашу шашу.(ата-ана)

Мұғалім: Бүгінгі «Тілашар» тойымызға келіп отырған №11 орта мектебінің

Директоры:Жағалбай Нурулдаұлына сөз беріледі.

Оқу ісінің орынбасары: Рая Даулетқызына беріледі.

Ата-аналарға сөз беріледі.

Бүгінгі тойымызды «Той бастар» әнімен аяқтаймыз. Тойымыз тойға ұлассын!

Құрметті ата-аналар,ұстаздар,оқушылар бүгінгі біздің «Әліппе деген алтын жол, апарар сені алысқа» атты тәрбие сағатымызды аяқтаймыз..