Урок - экскурсия по мокшанскому языку на тему Обобщение по числительному (6 класс)

МОУ «Старотеризморгская средняя общеобразовательная школа»

План-конспектсь

мокшень кялень урокса

6 класса

Темась: «Обобщениясь числительнайть коряс»

Урокть формац: урок-экскурсия Сире Теризморга велева

Урокть типоц: повторительно-обобщающай.

Урокса тевонь тиемань форматне: индивидуальнай, марстонь, групповой.

Урокть вятиец: мокшень кялень и

литературань тонафтысь

Сокорова Л.А.

Сире Теризморга велесь

2016г

Темась: «Обобщениясь числительнайть коряс».

Цельхне:

1. Познавательнай:

лятфтамс и кемокстамс содамошитнень числительнайть коряс; маштомашить кърхкалгофтомац числительнайть сёрмадомаса и азомаса;

числительнайть корхтамати маштозь сувафтомась.

2. Развивающай:

келептемс анализонь навыкнень морфологическяй признаконь коряс;

келептемс анализонь навыкнень валрисьмотнень коряс;

маштомс текстть коряс заданиянь тиема, основной мыслять вятема, выводонь тиема.

3. Воспитательнай:

тонафтомс иттнень родной кяльть вельде шарьхкодемс эсь народснон историянц и тяниень пингонь эряфонц, касфтомс содамошиснон мокшэрзянь народть культуранц колга.

Урокть формац: заочнай экскурсия Сире Теризморга велева.

Оборудованиясь: велеть карта-схемац, урокть электроннай презентацияц, проектор, интерактивнай доскась

Урокть типоц: повторительно-обобщающай.

Урокса тевонь тиемань форматне: индивидуальнай, марстонь, групповой.

Урокть мольфтемац:

1. Организационнай моментсь.

Тердемазь пайгонясь тяза,

Азомок: «Ушедсь уроксь!»

Партатнень ваксс сембе стяда, озада.

Ушедсаськ мокшень кялень урокть.

2. Содамошить актуализацияц.

- Шабат, ванода доскати и азость мезе тинь няйхтяда слайттнень эса. Слайд №1-8 (кулеви мора велеть колга)

Сире Теризморга велесь.

Васень лятфтаматне колганза - XVI в.

Эряйда - 796

Кутта - 288

Авада- 52%

Аляда- 48%

Возрастной составоц-10%-61%-29%

Нация коряс явомац:

Мокшеда-93,5%

Рузда- 4,4%

Украинецта-1,0%

Узбекта- 0,6%

Чувашта-0,5%

- А мезень колга карматама корхтама тячиень урокса? (Велеть и числительнайхнень).

Тячи минь мархтонт тихтяма заочнай экскурсия велева и лятфтасаськ, кърхкалгофтсаськ содамошиньконь числительнайть коряс.

3. Содамошитнень кърхкалгофтомасна.

Шабат, сёрмадсаськ тячиень числать и урокть теманц.

Комсь колмоце мартста.

Классонь тевсь.

Обобщениясь числительнайть коряс. Слайд 9.

Шабат, тячи тихтяма аф оцю экскурсия велева.

А тяни эрьда азсаськ экскурсияньконь целенц.

(Экскурсиять целец: лятфтамс и кемокстамс содамошитнень числительнайть коряс.) Слайд 9-10

Тячи мон карман экскурсиянь бюронь оцюнякс, а минь улихть экскурсаводоньке-вятниеньке якама васттнень коряс. Якамшовор минь карматама сёрмадома тетрадезонк. А тинь кулхцондость вятить и няйсасть, што числительнайсь-тя пяк эрявикс пялькссь корхтамаса, соньфтемонза стака шарьхкодемс корхтайть.

- Шабат, а кодама корхтама пяльксти мярьгихть числительнай?

(Числительнайсь-корхтамань пялькс, кона няфти аньцек лувома, предметонь лувомста порядка, отвечайхть мзяра?, мзяроце? Кизефксненди.)

Заданиясь 1: мусть числительнайхнень

Велезонк Саранскяйста эряви пачкодемс тяфта:

Саранскяень автовокзалста- Шайгаву-65 вайгяльбе;

Шайгавста-Теризморгав-8 вайгяльбе;

Сембоц: 73 вайгяльбе.

А тяни кулхцондсаськ васенце экскурсаводть (сообщения велеть колга) Слайд №6:

Монь велезе

Сире Теризморга велезе таргавсь Сивинь ляйть търваванза ниле вайгяльбень кувалмос. Лама ёмла ляйняда кандыхть эсь ару ведняснон Сивини: Шалмось, Куд ляйсь, Суксонясь, Рака ляйнясь.

Касыхть виренза велень паксятнень песа. Келемсть сяшкава, марнек пефтомот. Велеряйхне кельгсазь якамаснон вири нормаленкса, кстынкса, пангонкса, пяштенкса, банянди тяльмонкса.

Кода сетьме и мазы тяса перьфпяльсь! Тунда ваяй панжи марлюфнень потмос, а сёксенда велесь щасы лама тюсса щамонц, кода мокшаваня сърхкай оцю илас и лаподьсы лама тюсса панаронц-петьксонц. Сямольде валови сиянь пиземонь путьксса, шить сюрелданзон ала пиндолкшни, марнек мокшавать мяштьса лама тюсса зърняй кърганятне.

Кельгте атянь-авань мастор,

Кельгте сетьме Сивинь ляй.

Лацот пара ашень васьфте.

Лацот мазы ашень няе…

И.М.Девин

Келихть веленьконь перьфпяльге ащи паксянза, конатнень лангс шинять стяманц мархта, расаньбачк, лихневихть велень стадатне. А конашкава пара якамс кизонда лугава нормаленкса и опёнканкса! Лашмотнень эзга кяшендихть кельме ведня мархта лихтибрянят. Симомок эздост ведняда, сизефцевок ётай, эрьгяцевок эвондай. А кода танцти синь веднясна кизонь пси шиня! Куцемок панда пряти, кона кеподсь Сивинь ляйнять фкя тървасонза, велесь няеви, бта кядь кучкаса. Тя сембось кеподи мяль, кеняртьфти сельмованфть!

Велесь аф оцюволь, но сон кассь и келемсь. Эряйхне кирнесть мешт, касфнесть сёра, трясть жуватат. Сире Теризморгать эзда почкондасть лия велет: Акшусь, Порубсь, Уржась, Ожгась.

Октябрьскяй революцияда инголи велеса эрясь 3000 ломань. XVIII векть ушетксста велеса панчфоль церькав. 1882-це кизоня панчфоль церковно-приходской школась.

Великай Отечественнай войнать пингста вели ашесть мърда 400 велеряйда. Кизоста кизос эряйхнень лувкссна кържалгоды. Къда 1-це январьста 2008-це кизоня эряйда лувондовсь 830 ломань, то тя кизоть - 796 ломатть.

Заданиясь 2:

Шабат, азсаськ кодамот эряйхть числительнайхть составонь коряс? (числительнайхне эряйхть простойхть, сложнайхть, составнойхть.)

Сёрмадода фкя составной числительнай и склоняндасть аф определённай склонениять коряс им., род., дат. падежень коряс.

(Им. сисем сятт вейхксогемонь кота

Род. . сисем сятт вейхксогемонь котонь

Дат. сисем сятт вейхксогемонь котонди)

А тяни омбоце экскурсоводть кулхцондсаськ.(Сообщения церькавть колга).

Слайд №13

Велень Храмсь

Велеть кучкаса штатолкс стясь Храмсь. Ваномок аньцек Никольскяй церькавть стенанзон лангс, пиндолды вете куполонзон, колокольнянц лангс, конань серец 35 метра, оцю пайгонц, тёкшкаса крёснень лангс, марямок пайгонь гайфть-тя сембось мърдафнесамазь пяк ичкоздень пинкненди. Ся пинкненди, мзярда кирпицькя лангс кирпицькянь путозь кеподсть Храмть стенанза, конатнень эзда маряви и няеви сонцень велеть историяц, шарьхкодеви тястонь народть кувака киса кеподемац, сонь культурац. 1874-1885-це кизотнень квалмоста, а лисенди 11 киза потмоста, путфоль-арафоль Сире Теризморга велеть кучкас Никольскяй церькавсь. Лятфтави и ся, мзяра киза сон ащесь сёлкфста. Тяни эрь праздниконя, эрь ваймама шинь карша вятеви Храмса служба. И катк шиста шис кайгихть велеть вельхксса Храмть пайгонза и панчсесыне кели ортанзон шкаень шири моли ломаттненди и велень конакненди.

Тевть мольфтемац ёмла группава:

1874-1885-це кизотнень квалмоста, а лисенди 11 киза потмоста, путфоль-арафоль Сире Теризморга велеть кучкас Никольскяй церькавсь.

Заданиясь 3:

Васенце группати:

11, 15,19 числительнайхнень тиесть пуроптомань числительнайкс; ( суффикс:-нц,-цьке, -ксне)

Омбоце группати:

11, 15,19 числительнайхнень тиесть порядковай(лувомань) числительнайкс; (-це)

А тяни колмоце экскурсоводть кулхцондсаськ.(Сообщения школать, И.М.Девинонь колга). Слайд № 15

Школась. Илья Максимович Девин.

Эрь шобдаваня велень ульцява кайгихть идень вайгяльхть, конат эряскодыхть валда, лямбе школав. Велень школать улихть сонцень коенза-обуцянза. Тяса кельгозь тонафтыхть мокшень кяльти, корхтайхть вельденза, вятихть урокт. Корхневи урокста шачем ширть культуранц колга, ётафневихть илат, ванфтовихть сире койхне, морсевихть морот, азондовихть стихт.

Сире Теризморга велень ломаттне - морай ломатть. А кода сидеста илатнень эса морсесазь Илья Максимович Девинонь валонзон коряс ладяф мороть - "Панжи лайме порось". Сонь вельденза ломанць кепсесы мяленц, мазопнесы эряфонц. Илья Максимович оцю путфкс тись мокшэрзянь литературати. «Нардише» романцонза сёрмадсь велеряензон колга. А велеса Илья Максимович - тя фалу лятфнема ломань, ару вайме ломань. Школаса эрь кизоня ётафневихть "Девинскяй чтеният", коса лятфневи и корхневи сонь творчестванц, эряфонц, седиень токай валонзон колга. «Краеведениянь» кабинетса тиф лемозонза уженя, школать инголи путф монумент, конац васьфни эрь шобдава иттнень эса. А райононь библиотекась каннесы сонь лемонц.

Тя памятниксь путф велень геройхнень, сяськихнень лемс, конат тюрсть фашисттнень каршес тя стака 1941-1945-це кизотнень пингста эсь Родинаснон, эсь семьяснон, шачема ширеснон, вандыень сай валда эряфть инкса. 400 велеряй ашезь мърда меки куду войнаста. Велень эряйхне аф нардасазь эсь мялямстост геройхнень.

Заданиясь 4: мекольце валрисьмоти тиеда синтаксическяй разбор. 400 числительнайти тиеда морфологиять коряс разбор. (Взаимопроверка)

Тестонь коряс задания.( Шабатне тисазь листокс, полафтсазь фкя-фкянь мархта и проверясазь, путыхть оценка, правильнай оттветтне лихтевихть доскати).

Тест «Числительнайть» коряс

1. Числительнайсь - корхтамань пялькс, кона няфти:

1. предмет, предметть смузенц;

2. лувома, предметонь лувкс, лувомста порядкать;

3. действиять тииенц лангс.

2. Числительнайхненди, конат отвесчайхть мзяра? кизефксть лангс, мярьгихть:

1. лувомань;

2. лувксонь;

3. пуроптомань.

3. Числительнайхненди, конат отвесчайхть мзяроце? кизефксть лангс, мярьгихть:

1. целай лувксонь;

2. лувомань;

3. лувксонь.

4. Валрисьмоса числительнайхне молихть:

1. подлежащайкс, сказуемайкс, дополнениякс, определениякс, обстоятельствакс;

2. аньцек предложениянь главнай членкс;

3. аньцек предложениянь второстепеннай членкс.

5. Составонь коряс числительнайхне эряйхть:

1. простойхть, сложнайхть, парнайхть;

2. простойхть, сложнайхть, составнойхть;

3. сложнайхть, дробнайхть, простойхть.

6. Кодама суффикс вельде тиевихть порядковай числительнайхне?

1. - кс;

2. - це;

3. - ва

7. Кодама суффикс вельде тиевихть пуроптомань числительнайхне?

1. -нц, -цьке, -ксне;

2. -це;

3. - нек.

8. Кода сёрмадовихть парнай числительнайхне?

1. марса;

2. китькскя вельде;

3. запятой вельде.

9. Кода сёрмадови косвеннай падежса комсь числительнайсь?

1. - з буква вельде;

2. - с буква вельде;

3. - ос буквань сочетаниять вельде.

А тяни нилеце экскурсоводть кулхцондсаськ.(Сообщения Национальнай центрать(Мокшень илань кудть колга).Слайд №17

Мокшень илань кудсь

Мазомсь Сире Теризморга велеть кучкац! Акша баяравакс ащи Мокшень илань кудсь, коса аф аньцек кштихть-морайхть, аноклайхть выступлениянди, но и иттнень тонафнесазь мокшень котфть ланга сюрекить вятема, сёрмадома мокшень ожакит, ожнаста цифксонь и лия мокшавань нарядонь тиема.

Мокшень илань кудса ули музей, конань вельде няфневи эряфсь 19-це веконь пингста. Тяса нинге мяль салай музейно-этнографическяй комплекссь «Мокшанское подворье», козы фкя кизоня и сашендсть колма государствань «оцю» конакне. Илась кандсь тястонь эряйхненди, велень конакненди аф юкстави мяльхть. И тянкса лямбе седи ваксстонь валхт азондыхть Мордовиянь оцюняти, сембе лездыхненди.

Велесь эряй, эреклай, ванфты сире эряфонь койхнень-обуцятнень. Ару лихтибрянякс эвондайхть од койхть-обуцят. Велень эряйхне пачфтсть тячиень шити оцю фольклоронь козяши, конань вельде лац няевихть сонь мяленза-арьсеманза, тевонь тиемац, историяц. Народть ёткса улихть талантливай ломатть, конат маштыхть аф аньцек моронь морама, но и ёфксонь, легендань азондома-ладяма. Ня произведениятне ётнесть фкя поколенияста омбоцети аф ламода полафнезь. Тя пингти школаса тонафнихне кочксихть велестонк и оцювонь, и идень фольклор.

Заданиясь кяльть касфтоманц коряс 5:

Шабат, минь мархтонт кочкаме велеста лама идень фольклор. Кода тинь арьсетяда, а мезянди сон тейнек эряви? (койхне аф юкставихть, тя-минь культураньке, касфтови минь валонь запасоньке, вельденза няфневи эряфсь, шачема ширеть кельгомац )

Шабат, ванцась аноклафонтень.

4. Урокть итогонза.

Тянь мархта экскурсияньконь велева аделасаськ. Якада экскурсияс-тинь сяда кърхкалгодыхть содамошинте.

Тячи минь мархтонт аф аньцек велеть ваноськ, но и кемокстаськ содамошиньконь числительнайть коряс. Тяфтама экскурсият минь мархтонт тага ётафттама, сяс мес эсь краеньконь тейнек эряви содамс.

Велеть историянц тисазь эсонза эряй ломаттне, а тинь велеть-вандыень шиц.

5. Кудонь тевсь:

Кудса сёрмадода аф оцю азкс эсь семьянтень колга, нолдамок тевс числительнайхнень. Слайд №18

6. Рефлексия.

Шабат, а тяни азсаськ:

А мезе тинь тячиень урокста сяводе?

Мялезонт тусь уроксь? Няфтесть: кда тусь мялезонт-кеподесть якстерь смайликть, кда аф пяк -кеподесть сенем смайликть.