Дерс конспекти Незарет кочюрюв 'Айше'.

Дерс конспекти

Дерс мевзусы: Адий джумленинъ талили. Незарет кочюрюв «Айше».

Дерс макъсады: 1. Незарет кочюрювнинъ догъру язылувы акъкъында малюмат бермек.

2.Талебелернинъ агъзавий ве язма нутукъларыны зенгинлештирмек, инкишаф этмек.

3.Талебелерге Ватангъа, Ана тильге севги дуйгъуларыны ашламакъ.

Дерс теминаты: метин, дерслик, даркъатма васталар (карточкалар).

Дерс кетишаты

1. Тешкилий къысым. Селямлашув, дерске кельмегенлерини къайд этюв, талебелерни дерснинъ макъсадынен танытув.

2. Кечкен мевзуны тешкерюв, текрарлав.

1. Фронталь суаль - джевап:

а). Насыл джумлелерге кениш олгъан джумлелер дейлер?

б). Сойдаш азалы джумлелер бу насыл джумлелер?

2. Талебелерге карточка вастасы иле вазифелер бериле:

Карточка № 1.

Джумлени девам этинъиз:

Меним анам энъ…

Меним бабам энъ…

Карточка №2.

Сёзлерни терджиме этинъиз:

Дюльбер-

Мераметли-

Серт-

Севимли-

Акъыллы-

Карточка №3.

Кельген сёзлерден джумлелер тизинъиз ве бу джумлелерни талиль этинъиз:

Назик, адалетли, ишкир.

3. Эв вазифени тешкерюв.

3. Къалгъан талебелерге Аталар сёзлер окъула. Оларны терджиме этип, талебелер ибаресининъ манасыны насыл анъладылар тариф этелер.

«Окъувны севген-окъур, сонъундан гульдай къокъур».

«Алла сабырлы къулуны север».

«Терек не къадар юксек оссе де, тамыры ердедир».

«Ватансыз адам-йырсыз бульбуль».

4. Янъы мевзуны анълатув.

Оджа метинни даркъатып, незарет кочюрювнинъ догъру язылувы акъкъында малюмат бере. Оджанынъ беяны: «Урьметли талебелер! Метинни дикъкъатнен кочюрип язынъыз. Хаталарынъыз олмасын деп, башта метинни окъунъыз, сонъра кочюрип язынъыз ве оны тешкеринъиз».

Сонъ оджа эр бир талебеге экишер джумле сечип, бу джумлелерни талиль этмеге вазифени бере.

«Айше»

Айше уфакъ бир къызчыкътыр. Лякин яшы элиндеки пармакъларнен бир сайыда олгъаныны пек яхшы биле.

Оларнынъ эви демир ёл янындаки къайсы тереклерининъ тюбюндедир. Бутюн кунь ёлдан ешиль, къаверенкли, сары тренлер вызылдап кече. Айше копчек тасырдыларыны эшиттими, аллы-гуллю лялелернен орьтюли тёпечикнинъ устюне чапып чыкъа да, ёлджуларгъа элини саллай. Сырасы келип, тренге минсе экен! Ич олмадым бир керечик треннинъ пенджересинден эвлерине, эль саллап къалгъан ана-бабасына куле-куле бакъар эди.

Айше чокъ ишлер япып етиштире. Багъчадан от-олен джыйып, сепетине къоя. Эчкилери яш шорбаджысынынъ кетирген отларыны севип ашай. Айшенинъ къартанасы лезетли эчки сютюнен торунчыгъыны сыйлай.(91 сёз)

Э.Амиттен

5. Янъы мевзуны пекитюв.

1. Кочюрип язгъан метин не акъкъында? (бир къызчыкъ акъкъында)

2. Баш къараманнынъ ады насыл?(Айше)

3. Айшенинъ насыл бир арзу-истеги бар эди?(тренге минмеге)

6. Дерсни умумийлештирюв ве нетиджелев.

1. Сизлерде насыл арзу-истеклер бар?

2. Сиз тренде миндинъиз?

Эв вазифеси:

1. Кечкен мевзуларны текрарламакъ. «Меним арзу-истегим…» серлевалы инша язмакъ.

VII. Баалав.