9-Мамыр – Ұлы Отан соғысындағы Жеңістің 69 жылдық мерекесі барша халықтың басын қала ортасындағы «Мәңгілік есте» ескерткішінің басында тоғыстырды. Таңертеңнен бері соғыс жылдарындағы айтылған әндердің топтамасы фонограмма арқылы ойнап, жұртшылықтың еңсес

Бабалар ерлігі

Ұлы жеңіс мерекесі

2014 - 2015 оқу жылы

9-мамыр - Ұлы Отан соғысындағы Жеңістің 69 жылдық мерекесі барша халықтың басын қала ортасындағы «Мәңгілік есте» ескерткішінің басында тоғыстырды.
Таңертеңнен бері соғыс жылдарындағы айтылған әндердің топтамасы фонограмма арқылы ойнап, жұртшылықтың еңсесін көтерді.
Еңбектеген баладан еңкейген қарияға дейін сұрапыл соғыстың құрбаны болған ардагерлерімізді еске алып, тағзым ету үшін мереке өтетін алаңға жинала бастады. Ардагерлердің өшпес ерлігі Ұлы Отан соғысы жылдарында, қан майданға көрсеткен батырлық пен өжеттіліктері бойларына патриоттық рух беріп, Отанға деген сүйіспеншіліктің арқасында бейбіт өмірге қол жеткіздік.
Жыл санап Ұлы Отан соғысының ардагерлері арамыздан сиреп, алшақтап барады, десек те біздің аудан бойынша 40 ардагер аталмыш мерекені көпшілікпен бірге атап өтті. Әрине денсаулықтары сыр беріп, кейбіреуі төсек тартып жатса да дүбірлі мерекенің қадірлі қонағы ардагерлердің барына қуанамыз, оларды ардақтап төбемізге көтереміз.
Дүниені дүр сілкіндірген майдан даласында қаншама ағаларымыз ерлікпен шайқасып, елімізге оралмады. Ата-анасымен қауышып, туған жерінің топырағы бұйырмаған боздақтарымыз қаншама, баласынан келген қара қағазды кеудесіне басып, өмір бойы күтіп жүрген асыл аналарымыздың көз жасына кім жауап береді? Тарих бетінде қара әріппен жазылған қаралы күнді киелі өскелең ұрпақ көрмесе екен, елімізде тыныштық, әлемде бейбітшілік болсын деп тілейміз. Қасиетті күннің қадірменді қонақтары болып, соғыс ардагерлерімен бірге еңбек және тыл ардагерлері, ауған соғысының жауынгерлері, Щучинск горнизонының әскери құрамдары мерекелі күннің шырайын келтірді.
Мемлекетіміздің Әнұраны шырқалып, Ұлы Жеңістің 69 жылдығына арналған салтанатты жиын ашық деп жарияланды. Ауданымыздың әкімі Нұрлан Нұркенов трибунаға шығып, барша жиналған жұртшылықты аталмыш мерекемен құттықтады. Ел басына күн туған ауыр заманда соғыста жүрген бауырларымызға қамқорлық танытып, қолдан келген көмектерін аямай, майдангерлерге қол ұшын созған тыл еңбеккерлеріне өзінің алғысын білдіріп, мейірімді көңіліндегі қуаныштарын жеткізді. Соғыс ардагерлерінің келер жылғы 70 жылдық мерейтойды бірге қарсы алып, күш-қуаттарының мықты болуына назар аударып, ерен ерліктері үшін бас иіп, тағзым етті.
ҚР Қорғаныс министрлігі Ұлттық қорғаныс университеті бастығының орынбасары Серік Асанов Щучинск әскери гарнизонының атынан барша қауымды құттықтап, жүрек жарды сезімдерін білдірді.
Соғыс, еңбек және Қарулы күштер ардагерлері аудандық кеңесінің төрағасы Малгелді Жұмағұлов аудандағы барша ардагерлерді Жеңіс мерекесімен құттықтай отыра, ардагерлердің жастарды тәрбиелеудегі патриоттық рухтарының адал екендігіне көз жеткізіп, ұйымдастырылып жатқан көпшілік іс-шараға белсенділік танытып жүргендерін тілге тиек етті. Кемел келешегіміз жалындаған жастардың атынан Шоқан Уәлиханов атындағы Кадет корпусының кадеті Айдос Қойтбаев сөз алып, еліміздің болашақ қорғаны ретінде ардагерлерді ардақтап, үлгі тұтатынын шынайы жеткізді.
Ескерткіш басына гүл шоқтары қойылып, митинг аяқталған соң ардагерлер аудан басшысымен естелік суретке түсті. Қалалық саябақта жыл сайын әскери дәмханадан дәм тататын ардагерлерді бұл жолы да Шоқан Уәлиханов атындағы республикалық Кадет корпусы бар сән салтанатымен, қонақжай көңілмен қарсы алды. Ботқадан ауыз тиіп, әскери дағдыға енген жүз грамнан да ардагерлеріміз шамаларынша көңіл көтеріп, әуезді әннің баурайында тынығып дем алды.
Аудандық Мәдениет үйінің алдындағы орталық алаңда аудандық халық шығармашылығы байқауының жеңімпаздары жекелеген өнер топтары ән мен жырдан шашу шашты. Тойдың көрігін спорттық жарыстар да қыздыра түсті. Жастарға арналған кешкі ойын-сауық бағдарламасы да әсерлі өтіп, Жеңіс мерекесіне арналған отшашу аудан тұрғындарына шаттық сыйлады.