Сочинение ко дню Республики

Сәләм хаты!

Һаумы , Башҡортостаным!

Мин әле бик йыраҡта, ләкин минең уйым, йөрәгем һәр ваҡыт һинең менән. Тыуған яғым, минең Башҡортостаным, һиңә сәләм йылы һәм ҡояшлы диңгеҙ буйынан. Мин һине бик һағындым.

Ерҙә юлдар алыҫ алып китһен,

Мин барыбыр тыуған илемдә.

Тыуған илгә булған һөйөүемде

Әйтермен тик туған телемдә, - Рәшит Назаровтың ошо шиғыр юлдарын тик хәҙер генә аңланым.

Ҡуйы урмандарыңа кереп, сәскәле болоноңдағы сылтырап аҡҡан шишмәңдән битемде йыуып, туйғансы татлы һыуын эсеп, йәшел үләнгә ятып, зәп- зәңгәр күккә ҡарап ятыр инем. Ә һуңынан шаулап үҫкән ағастар күләгәһендә ял итеп уйланып ултырыр инем. Бейек-бейек тауҙарыңа менеп, сикһеҙ далаларыңа ҡарап минең үҙәккә үтерлек матур Республикама ҡарағым килә. Бигерәк тә мин үҙебеҙҙең башҡорт балын, ҡымыҙын, һуҙылып аҡҡан ҡурай моңдарын һағынам. Әсәйемдең бешергән икмәген, тәмле бәлештәрен иҫкә төшөрәм.

Һин бит, тыуған яғым, миңә ғүмер биргән әсәйемде лә үҙеңдең иҫ киткес матур ереңдә үҫтергәнһең. Башҡорт ере ниндәй генә бай булмаһын, ул үҙенең төрлө милләтле халҡы менән бай.Киләсәк быуын тыуған илендә йәшәһен, үҙ телендә һөйләшһен. Һуғыштар булмаһын, бөтәбеҙ ҙә иҫән-һау йәшәйек. Һәр кем үҙенең милләтен ғорурлыҡ менән әйтергә тейеш. Еребеҙҙә халыҡтар үҙ ара бик дуҫ йәшәй. Шул дуҫтарым янына ҡайтаһым килә, минең күршеләрем менән ҡапма-ҡаршы ултырып һөйләшәһем килә.

Оҙаҡламай мин үҙемдең бәләкәй ауылыма, тыуған өйөмә ҡайтам. Мин һиңә ҡайтам, минең Ватаным. Хуш, һау бул, Башҡортостаным! Көт мине! Осрашҡанға тиклем!