Ашық сабақ. Өзін-өзі тані пәні бойынша. Сабақтың тақырыбы 'Кешірім мен келісім' 4 сынып

Дайексөз. «Қыл өтпестей татулықты бір ашуға сатпайық» /М.Әуезов/

Оқушылар дәйексөздің мағанасын ашып түсіндіреді.

1. Татулық дегенді қалай түсінесіңдер?

2. Адамдар арасында реніш туғанда қалай татуласады?

3.Өз бастарыңнан өткен қандай жағдаяттарды мысал келтіріп айта аласыңдар?

Дәйексөзді дәптерге жазып алу.

Әңгімелеу:

«Құм мен тас»

Екі дос шөл далада саяхаттап жүреді. Бір кезде екуі ұрысып қалады да, біреуі екіншісінің жағынан тартып жібереді. Соңғысы ауырсынса да ештеңе айтпайды, тек құмға былай деп жазады: «Бүгін менің ең жақсы досым менің жағымнан шапалақпен тартып жіберді». Олар әрі қарай келе жатып көгалға кездеседі, сол жерде шомылып алмақшы болады. Шапалақ жегені суға секіріп кетеді де, батып кете жаздайды. Бірақ досы оны құтқарып қалады. Ол өз-өзіне келген кезде, тасқа былай деп жазады: «Бүгін менің ең жақын досым, менің өмірімді құтқарып қалды». Сол кезде оны жағынан тартып жіберген, құтқарып алған досы сұрайды:

-Мен сені ренжіткенде сен құмға жаздың, ал енді тасқа жазып жатырсың. Неге?-деп сұрайды. Досы былай деп жауап береді:- Бізді біреу ренжіткенде, жел өшіріп тастау үшін біз оны құмға жазуымыз керек, ал біреу жақсылық жасаса, оны өшірмейтіндей етіп, тасқа қашап жазуымыз керек. Өкпеңді құмға, қуанышыңды тасқа қашап жазып үйрен дейді.

Сұрақтар:

1.Бұл әңгіме кімдер туралы?

2. Олардың арасында қандай оқиға болды?

3.Ол қандай ойды құмға, қандай ойды тасқа жазды?

4. Егер сендердің өмірлеріңде осындай жағдай болса, не істер едіңдер?

Шығармашылық жұмыс, топтық жұмыс.

1-топ: «Мен кешірім сұрай білемін...» тақырыбына шағын эссе жазу.

2-топ: Жағдаятты шешу.

Жанар мектептен бүгін көңілсіз оралды. Ол құрбысы Мадинмен тұңғыш рет ренжісіп қалды. Үзіліс кезі болатын. Ең жақын досы Мадина Жанардан айнасын сұрады. Досының көңілін қимай Жанар айнасын берген еді. Мадина айнаға қарады да, шыр айналып билей бастады. Жанар:

-Абайла, айнам сынып қалмасын. Оны анам сыйлап еді, Ол мен үшін ең қымбат сыйлық,-деді. Сөйткенше болған жоқ, айна жерге түсіп кетіп,сынды да қалды. Жанардың көзі жасаурап кетті.

-Ой не болды сонша, айна деген арзан емес пе?-деді Мадина. Жанар не дерін білмей, тұрып қалды.

Сұрақтар:

1.Мадина мен Жанардың достығы қалай жалғасуы мүмкін?

2.Сендер мұндай жағдайда не істер едіңдер?

3-топ: Т кестесі. Кестенің бір жағына өз бойындағы жақсы қасиеттер, досының бойындағы жақсы қасиеттерді теріп жазу.

Топпен ән айту

Мейірімді болайықшы, ағайын

Көктем етіп көркейтсе де маңайын,

Көріп жүрміз өкпешілдің талайын.

Өкпелеуді қояйықшы өзгеге,

Кешірімді, болайықшы ағайын!

Көк нөсерін көл етсе де жауындар,

Көк пен жерді сел етсе де дауылдар.

Пейілерді пенделікпен тарылтпай,

Мейірімді болайықшы ағайын!

Болашаққа қол ұстасып барайық,

Ақиқаттың ауылын іздеп табайық.

Кішірейіп кетпес ғазиз басымыз,

Кішіпейіл, болайықшы, халайық!

Ән айту

Үй тапсырмасы.

73-бет «Көп біріксе-береке» мәтінді оқып келу /М.Төрежанов/

Оқулық 73-бет

Соңғы тыныштық сәті.

-Көзімізді жұмып,тыныштықта бүгінгі сабақты есімізге түсірейік.

Әрқайсымыз оң қолымызбен жүрегімізді ұстап көрейік. Өз жүрегіміздің жылылығын сезініп, жүрек жылуымызды адамдарға, айналамызға жеткізу үшін іштей оларға жақсы тілектер тілейік. Жақсы ой ойлайық, жақсы сөз сөйлейік, жақсы іс жасайық, әрқашанда кешірімді болайық! Бүгінгі сабақтан алған әсерлеріңізді жүректеріңізге түйіп алыңыздар. Рахмет! Көздеріңді ашуға болады.

Жағымды әуен қосу 2-3 мин